BRANTAKU

Sore kuwi, ing perenging Gunung Kendheng

dak sawang wit-witan katon ijo

ngrembuyung subur lan tedhuh

Sanadyan isih ana giwing kang sela

ngatonake gegambaran lemah gamping putih,

sajak nambahi eloking sesawangan.

Angin silir ngobahake  gegodhongan

kabeh pada njoged, nut iramaning bayu.

Manuk jalak Uren padha bali nyedhak mring susuh

ngoceh lan jingklak-jingklak jejogedan

maringi kabar yen dina iki gumbira

ora kurang pangan lan pangonan.

Nanging,

atiku isih rongeh, yen ngelingi gegambaran kenya ndesa

rong puluh tahun kepungkur

Kenya kang sulistya ing warna

Sebaya papa sebaya mulya

Prasetya bakal mithuhu dhawuh garwa

Ngabekti urip runtang runtung rerentengan.

Nanging,

Duk semana pamitanmu pengin golek ngelmu

dak lilani, paring jurung pangestu

muga kasembadan ing sedya

Ora ngira jibul sulaya,

balimu kekanthen priya liya.

Mula seprene, aku ngulir budi mawas diri

Apa iya kuwi wangsulanmu?

Apa iya kuwi asok bulu bektimu?

Nanging,

Aku percaya, prasetyamu ora luntur.

Aku percaya, brantaku bakal kotimbangi.